Kəşf et

On Əmr

20:1 Allah Öz əmrlərini İsraillilərə bu sözlərlə çatdırdı: 2 «Mən sizi Misirdən, kölə olduğunuz ölkədən qurtaran Rəbbiniz Allaham.

3 Məndən başqa tanrınız olmasın.

4 Göydə, yerdə, dənizdə olan heç bir şeyi özünüzə büt etməyin. 5 Bütlərin önündə əyilməyin, onlara ibadət etməyin. Çünki Mən Allah sizin Rəbbinizəm və başqa tanrılara səcdə etməyinizə dözə bilmərəm. Mənə qarşı çıxan ataların cəzasını onların üçüncü və dördüncü nəslinə qədər övladlarına verərəm. 6 Amma Məni sevən və əmrlərimi yerinə yetirənlərin mininci nəslindən də Öz şəfqətimi əsirgəmərəm.

7 Mən Allah sizin Rəbbinizəm. Adımı boş yerə dilinizə gətirməyin. Adımı boş yerə dilinə gətirəni cəzasız qoymaram.

8 Şənbə gününü Mənə həsr edin; bu günün müqəddəs gün olduğunu unutmayın. 9 Altı gün çalışın və bütün işlərinizi görün. 10 Yeddinci gün – Şənbə günü isə Mənə, Rəbbiniz Allaha həsr edilməli olan istirahət günüdür. O gün siz oğullarınız, qızlarınız, qullarınız, qarabaşlarınız, aranızda olan qəriblər, hətta heyvanlarınız da heç bir iş görməsin. 11 Çünki Mən Rəbb yeri, göyü, dənizi, dünyada olan hər şeyi altı günə yaratdım, yeddinci günü isə istirahət günü elan etdim. Odur ki, Şənbə gününə bərəkət verib onu müqəddəs elan etdim.

12 Mən Allah sizin Rəbbinizəm. Ata-ananıza hörmət edin. Onda sizə verəcəyim ölkədə ömrünüz uzun olar.

13 Adam öldürməyin.
14 Zina etməyin.
15 Oğurluq etməyin.
16 Heç kimə böhtan atmayın.
17 Heç kimin evinə, arvadına, quluna, qarabaşına, öküzünə, eşşəyinə – heç bir şeyinə göz dikməyin».

18 Adamlar göy gurultusunu, şeypur səsini, şimşəkləri və dağın zirvəsindəki qatı tüstünü görəndə qorxudan titrədilər. 19 Dağdan uzaqda dayanıb Musaya dedilər: «Nə olar, Allah bizimlə danışmasın, yoxsa ölərik! Bizimlə sən danış, səni dinləyərik». 20 Musa xalqa dedi: «Qorxmayın, Allah sizi sınağa çəkmək üçün gəlib. O sizin mömin olmağınızı və günahdan çəkinməyinizi istəyir». 21 Musa içində Allahın olduğu qatı buluda yaxınlaşanda xalq uzaqda dayandı.