Kəşf et

İnsafsız qul məsəli

18:21 O zaman Peter gəlib İsaya dedi: «Ya Rəbb! Bir imanlı qardaşım mənə qarşı günah edərsə, mən onu neçə dəfə bağışlamalıyam? Yeddi dəfəmi?» 22 İsa ona dedi: «Sənə deyirəm: yeddi dəfə yox, hətta yetmiş dəfə yeddi qədər də günah etsə, onu bağışlamalısan.

23 Səmavi Padşahlıq öz qulları ilə haqq-hesab aparan bir padşaha bənzəyir. 24 Padşah haqq-hesab aparanda onun yanına milyon qızıl pul borcu olan bir qul gətirildi. 25 Amma onun borcunu verməyə pulu olmadı. Onda ağası əmr etdi ki, həmin adamın özü, arvadı, uşaqları köləliyə satılıb, bütün malı da əlindən alınaraq borcu ödənilsin. 26 Bunu görəndə qul yerə yıxılıb baş əyərək dedi: “Bir az gözlə! Mən hamısını ödəyəcəm”. 27 Ağasının qula yazığı gəldi, onu buraxdı və borcunu bağışladı. 28 Qul isə bayıra çıxıb ona yüz gümüş pul borcu olan başqa bir qulla rastlaşdı. Onu tutub “Borcunu ödə!” deyə yaxasından yapışdı. 29 O biri qul yerə yıxılıb yalvarmağa başladı: “Bir az gözlə, borcunu ödəyəcəm”. 30 O isə razılaşmadı. Borcunu ödəyənə qədər onu zindana saldırdı. 31 Baş verən hadisəni görən digər qullar çox kədərləndilər və gedib hadisəni ağalarına danışdılar. 32 O zaman ağa həmin qulu yanına çağırıb dedi: “Ey pis qul, bütün borcunu sənə bağışladım, ona görə ki mənə yalvardın. 33 Axı mənim sənə yazığım gəldi. Bəs sənin niyə o biri qula yazığın gəlmədi?” 34 Ağası qəzəblənib onu borcunu ödəyənə qədər işgəncə verənlərin əlinə verdi. 35 Əgər siz də imanlı qardaşlarınızı ürəkdən bağışlamasanız, Səmavi Atam da sizinlə elə rəftar edər».