Kəşf et

İsa yetmiş nəfəri vəz etməyə yollayır

10:1 Bu hadisələrdən sonra Rəbb daha yetmiş nəfəri xidmət işi üçün təyin etdi. Onları Özünün gedəcəyi hər şəhərə və hər yerə Özündən əvvəl göndərdi. 2 İsa onlara dedi: «Məhsul bol, işçilərsə azdır. Buna görə də məhsulun Sahibinə yalvarın ki, Öz məhsulunu yığmaq üçün işçilər göndərsin. 3 Gedin, sizi qurdların arasına quzular kimi göndərirəm. 4 Özünüzlə pul kisəsi, çanta və əlavə çarıq götürməyin. Yol boyu heç kimlə salamlaşıb danışmayın. 5 Hansı evə girsəniz, əvvəl “Evdəkilərə salam olsun!” deyin. 6 Əgər orada salama layiq bir adam varsa, salamınız onun üzərində qalacaq. Yox, əgər belə bir adam yoxsa, salamınız özünüzə qayıdacaq. 7 Girdiyiniz evdə qalın, sizə nə verirlərsə, yeyib-için, çünki işçi öz haqqına layiqdir. O evdən başqa evə köçməyin. 8 Hansısa bir şəhərə girdiyiniz zaman sizi qəbul edirlərsə, qabağınıza qoyulanı yeyin. 9 Orada olan xəstələrə şəfa verin və onlara deyin: “Allahın Padşahlığı sizə yaxınlaşıb”. 10 Amma hansısa bir şəhərə girdiyiniz zaman sizi qəbul etməsələr, oranın küçələrinə çıxıb belə deyin: 11 “Hətta şəhərinizin ayaqlarımıza yapışan tozunu da sizə xəbərdarlıq olaraq çırpırıq. Amma bunu bilin ki, Allahın Padşahlığı sizə yaxınlaşıb”. 12 Sizə düzünü deyirəm: Qiyamət günü Sodomun halı o şəhərin halından daha asan olacaq».